TI MAIKADUA NGA IYAAY*

Ibagak manen:
Agawidak nga umapon
iti arpad. Panunotennak a kas maysa a tumatayab
manipud iti dakkel a danum
iti daydi a Layus, siak, nga umay
agtuktok iti ridawmo
a kas kadagidi panagtuktoktukko
agingga a dimteng ti sardam--

kellaat a nairikep dagiti tawa,
bimmaba dagiti kortina

(ket ti siled nauneg a gukayab
a nagkarkaradapan iti pumpon-samiweng
manipud iti sellang ti taaw.)

Nagsaok koma maipapan kadagiti anghel
ken kerubim, iti puraw nga ulep nga agam-ampayag
nainnayad nga agam-ampayag iti langit
a kasla iti sala ti kalgaw.

Kinantaanka koma
Kadagiti samiweng a naabel kadagiti nginabras ti buokmo.

Ibagak manen:

Agannadka iti manglimlimo
a naggapu iti mangliwengliweng a sipnget
iti dayaen ti Minuyongan, iti daga a nangipasngay
kadagiti adu a dila ti apuy ken alliaw.

Dayta a mangaskasaba iti panagpagunggan ken gura!
Dimo luktan 'ta ridawmo.

Adda panaggibus dagiti gubat, dagiti saosao
Maipapan kadagiti gubat, dagiti didigra
Nga impadto dagiti ulbod a profeta.
Agannadka ta umayakto manen.

Siakto ti agtaktakder iti sango ti ridaw,
siak a nangipangag iti ayab-rabii,
siak nga umay iti ulimek ken ayamuom ti rosas iti dakulapmo
siak a maysa a kalapati nga agar-areng-eng, agun-unnoy kenka,
siak nga agun-unnoy iti daniw ni ayat nga awan patinggana.

Originally published in Bannawag, the Ilokano weekly magazine

para la mujer: this is about the second coming, as the title suggests, a militant religion that promotes death and violence, and christianity.

*Nairaman iti antolohia dagiti dandaniw iti Ilokano ken Ingles, "Umayka Manen, Ganggannaet/Come Again, Stranger".