para ken ni grace padaca
Siasino ngamin ti makalagip
Kadagitoy a bambanti? Dakami
Laeng a lingka ti daga,
Dakami a mangyarado iti bagbagimi
Iti agmatuon idinto nga agkatkatawa
Dagiti nangituray iti imeng
Dagiti palasioda iti tangatang
Idiay Manila idiay Baguio
Idiay Tagaytay idiay ballasiw-taaw.
Siasino ti makalagip kadagiti nasipnget a rabii
Idiay Angadanan ken San Isidro
Idi rinumekda dgiti sagrado
A pangngeddengmi?
( Ay, dagiti natadem a kawwet
Ti basingkawel pinisangda dagiti balota
Iti atiddog a pasilio ti bilegda!)
Kasapulan nga agkantakami
Ngem uray iti bambantay
Saan a mabilang dagiti maligsay
A tarumpingay ket alimbagasenkami
Iti adu a dissuor dagiti barukongmi.
Nalpasen dagiti ublag ken tirtiris
Ta nasarakanmi dagiti timekmi
Ket sangsangkamaysakami a nangyebkas
Iti luksaw ken pungtotmi
Kadagiti rabngis iti kalinteganmi.
(Uray no dagiti sayukmo ti rikna
Ibatadna met ti kawaw a kararua.)
Ita, mabalinmi a panawan dagiti balaymi,
Dagiti agdan iti sanggir dagiti kawayan
Dayyengenmi ngarud ti duayya ti namnama
Ken wayawaya.
Ket ti balligim isu met ti kantami.
naipablaak iti bannawag
photo: the sala of the house in Winchester, CA
No comments:
Post a Comment