Ti linteg agbendita ket agparintumeng
A sumaklang iti altar ni Apo Santa Maria
A kinawesanna iti nangingina a seda.
Ti linteg agrosrosario a mangidaton
Iti kinahon a sensilio nga inagabna,
Agraman dagiti sabsabong
A kinettelna iti kagangganusanda.
Ti linteg sagursor uray awanen iti takem.
Ti linteg adda latta kaptanna uray iti tadem.
Ti lingka makumikom iti inaldaw a taraonna.
Ti lingka a turay koma napukawna ti timekna.
Ket ni idolo, ay-ayamenna ti sigarilio
Iti naranggas a ngiwatna, mangurat
A mangiwagayway iti dadakkel nga armasna
Idinto nga agpagunggan iti ariangga
Dagiti bakes nga agrukbab kenkuana.
Ti linteg sabali ti kitaenna, saanna nga ammo
Ti pilladsona, saanna a maamiris ti sasawenna.
Ay, kasta la ketdi ti biag--raritem ti kaha,
Aglemmeska iti derrep, uray ania't aramidem.
Awan arindenggan--baribari tagatagari--
Ngamin ta iti kamaudianan pakawanendaka
Tapno ipaulogmonto met ti pammakawan
Kadakuada inton dumteng ti pannakaukomda.
(Ama, pakawanem ida ta nabartekda?
Ngem putdem koma dagiti atiddog nga imada
Ket ipungetmo metten dagiti ababa nga ipusda.
Ken, Apo Jehova, taltalem kadi dagiti itlogda
Tapno maminggan ti panagramaramda iti daga.)
Ti linteg agbendita ket agparintumeng
A dumatag iti saklang ni Apo Santa Maria.
Ti linteg agrosrosario a mangidaton
Iti kinahon a sensilio nga inagabna.
Originally published in Bannawag, the Ilokano weekly magazine printed in the Philippines
*with the present Senate investigations, the metaphor also applies to corrupt military "officers and gentlemen."
No comments:
Post a Comment