RAVENNA
Gapu ta malagipko ti nalabaga a rosas
Maminribu a matayak kadagiti alimbasag
Ti parbangon.
Diak ammo ti nagpaingan 'di pagaw
Dagullitek ti magna iti nasipnget a pasilio
Ngem makaalliaw ti arimbangaw ken dung-aw.
Yunnoyko iti sallukob ti sardam, Agsublika,
Ravenna, awanen ti bagyo: nalangton ti karuotan
Kadagiti minuyongan.
Kasla tudo ti panagtinnag ti lua
Iti patakder-arapaap iti kadaratan: Di agrupsa
Dagiti lagip iti kayanga a pimmusay.
Agdaranudor ti init, aginit ti bulan
Dara dagiti lua-dagensen nga agbayakabak.
Rurog dagiti agkankanta iti kannag.
Umayka, Ravenna, limneden ti bulan.
Malamminakon, awanen dagiti agsasala.
Nalamiisen dagitoy mailiw nga ima.
TI SUNGBAT
Agtulid latta dagiti lua ta ti lubong
Adda dagiti sakana iti daga.
Limmasattayo kadagiti siit-siitan a dana
Iti napuskol nga angep ti tiempo
Ket dagiti tugot agturongda
Iti garangugong ti pakadadaelan.
(Agtatakdertayo iti rabaw dagti rebba
Ken reggaay ti adu a sibilisasion.)
Isu met laeng a rupa
Ay, isu met laeng a rupa, ti masabattayo
Iti agmatuon, nabannog, napaksuyan.
Ayan ti agdan ti init?
Bay-an a malayus dagiti kalsada ti Rama
Bay-an a dung-awan dagiti babbai
Dagiti annak a pinanawanda.
Sadanto la agsardeng no agsublida
Kadagiti dimmapo a daniw ti historia.
Agtulid latta ti lua ta ti lubong
Sipaparnged dagiti sakana iti daga.
"Umayka Manen, Ganggannaet/Come Again, Stranger" is a new edition of the anthology of poems in Ilokano and English with introduction written by Dr. Aurelio Solver Agcaoili of the University of Hawaii at Manoa. A native of Laoag City in Ilocos Norte in the Philippines, Dr. Agcaoili is the coordinator of the Ilokano program of UH.
No comments:
Post a Comment