DUNG-AW 1*

ti sallapingaw agtayab

uray no matnag met

     ammo ti nakatugaw iti trono

     ammona amin

ngem apay a saan nga agkuti

     idinto a madayyegen

     daga dagiti agpalpalama

     daga dagiti tagabu

     daga dagiti mananggundaway

     daga dagiti aglablabonan

     daga dagiti mabisbisinan

     daga dagiti maidaddadanes

     daga dagiti balangkantis

     daga dagiti balimbing

     daga dagiti loyalista

     daga dagiti korista

     daga dagiti komunista

     daga dagiti demokratiko

     daga dagiti aktibista

     daga dagiti huramentado

     daga dagiti politiko

     daga dagiti mestiso

     daga dagiti bago

     daga dagiti nagabito

      (a masansan a bumaba

         iti pulpito)

     daga dagiti nasingpet

     

     daga dagiti nadulpet
     

     ay, ti telon ti anarkia
     ay, ti telon bumabbaba
     ay, ti telon lumabbaga
     (ama, kaasiannakami
      ama, talliawennakami)

     piman ti sallapingaw
     piman nga agkatangkatang
          iti tangatang
     ay, ti aligagaw
     ay, ti tabbaaw
     ay, ti sennaay
     ay, ti am-amangaw
     dinto agsardeng
     ay, dinto agsardeng
     agingga nga isu
     nga agpampanunot
     sipatenna't mugingna

     pagallabatenna't pispisna
    ket tumakder
     iti nagtugawanna

     ngem inton isuda a nagbandera
     aramidenda nga armas
           dagiti iggemda?

*Nairaman iti "Umayka Manen, Ganggannaet/Come Again, Stranger", antolohia dagiti dandaniw nga Ilokano ken Ingles a putar ni Peter La. Julian, mannurat ken periodista. Adda introduksion nga insurat ni Apo Aurelio Solver Agcaoili, coordinator of the Ilokano program of the University of Hawaii at Manoa.