DUNG-AW V*

No koma iti ballasiw-taaw
     ti pagrairaan ti panagrarit
No koma iti sabali a puli
     ti pagnguduan ti panagpagunggan
Nalabit a nasken ti pannakariing
     dagiti karayan, saan nga iti danum
     no di ket ti natingra a dara
     dagiti mapuoran a daton

Magat High Dam in Aguinaldo, Ramon, Isabela, Philippines

Anian a daeg daytoy nga entablado
     idinto a ti lubong maray-aw
     Siasino dagiti bannuar?
    Pasgedan kadin ti mitsa
     tapno dumapo ti kaputotan
     aggibus ti pannakairurumenna?

Ay, ti agtagikua iti daga!
Ay, ti tagabo ti ganggannaet iti balayna!

Kas iti panangkamat iti angin
     awan mamaay dagiti sangit-ikkis
     dagiti babalaw ken dung-aw
     uray dagiti agibayog iti tarigagay
     agtungpalda iti pannakaupay

(Kaanonto, Ama, a maugasan ti rugit
     dagiti bibigda, maikkat sarwa
     dagiti taraon a samsamsamenda?
Kaanonto a maputed ti ima ken sakada
     tapno maminggan ti panagranggasda?)

Anansata di agsarimadeng ti biag
     agwerret dagiti darikmat
     adda latta dagiti tagtagainep
     adda latta dagiti agsapa 
     adda latta tabbaaw ken am-amangaw
     uray no agpundo ti danum iti taaw

(Nabayag a naguray daydiay a kalsada
     Ket dagiti nagballigi isuda ti historia?)

Ket adda kadi ngarud ti pannakapaay
     iti panagbirok kadagiti bugas
     iti panagsarak iti ubbog ti ayat
     kadagiti baro nga irurusing
     uray iti agdama nga irteng
     ta agpalangit dagiti akkub nga ima
     ket ti ayamuon sumuknor iti ginget
    iti taeng ti agturay a saan a makita?


*Nairaman iti antolohia dagiti dandaniw a napauluan iti "Umayka Manen, Ganggannaet/Come Again, Stranger".  Addaan kritikal nga introduksion ni Dr. Aurelio Solver Agcaoili iti University of Hawaii at Manoa.