1.
Rinibun dagiti immay a sumipnget
Iti daytoy nailet a lubong ti sennaay.
Dimmagan bulbulong iti salogan
A nakaibatian sanaang kari a natallikudan.
Lipatem, lipatem, inyik-ikkis ti panawen.
Apay a pabaludka't saem ti nanglipaten?
Ngem bugbugtong ti saning-i 'toy barukong:
Ay-ayatenka, ay-ayatenka.
Bay-an a ti rikna ti mangituray iti pannusa.
Sapsapulenka iti ginget dagiti rupsa ni ayat.
Sarsarakenka iti anasaas dagiti baresbes,
Kumarkaranyo pay laeng ti timekmo, ay,
Ti naumbi a timekmo kadagiti ubbing a rabii.
Ap-appopuek ti nabalitokan a nginabras
Ti talukatik ti kanta a saanto nga agkupas.
Naikeddengen: sika ti kalbaryok.
Sika ti luak.
Sika ti saibbekko.
Naikeddeng metten: sika ti aminko.
O sika ti isemko.
O sika ti initko.
Ket no mangngegmonto ti aweng ti kutibeng
Iti labes ti panawen, siakto pay laeng daydiay,
Agun-unnoy, agpakpakaasi, siakto pay laeng
A mangisarsarang kenka iti nalabaga a rosa,
Ti pusok a nadigos iti dara.
2.
Saanmo koma a liplipatan nga immayka,
Ditoy lubongko nagpaingka, maysa a daniw
Iti saan nga agpatingga nga iliw.
Kankanayon idi nga adda awanan dara
A panagpitik ti puso nga agpuspussuak
Iti rugso nga agpaay laeng kenka.
Kankanayonak idi iti kasipngetan
Saan a gapu ta kaamakko ti raniag
Dagiti agsalsaludsod a matam. Kinabutengko
Ti ladawan ti dayyeng, ti rikna a di agparbeng.
Malaglagipko dagiti simmangbay a kali
Iti baybay ti Jale, dagiti agpaigid a dalluyon.
Malaglagpko daydi nalipatam a kuentasmo
Iti naipusing a rabii.
Iti asul a langit agtayabto
latta ti pagaw ti nasudi nga ayat.
Immaymo inasak dagiti sabong ken kanta
Iti minuyongan ti rosal a panawen
Ti tartaraudi ti Hunyo.
Dios-ti-kumuyog.
3.
Russuodekto ti napuskol a kabiti
A namagsina iti law-ang ken taaw
A nagbaetanta ket maakasto ti langeb
Ti liday ken sangaribu-ket-maysa a segga.
Agbiagkanto iti wirawir ti angin
Iti naliday a rimmuong dagiti rosal
Kadagiti umarudok a sumipnget
Iti naulep a langit, iti berde a tanap.
Kasano't mangiwagsak iti lidem?
Kasano't mangsarait iti sugat?
Mangpunas iti sakit ti nakem?
Sadin' ti yan ti bileg, sadin' ti yan
Ti kinadatdatlag ti panawen a mangisubli
Rayray ti lubong.
Irag-o ti rikna a dimmapon dagiti rosas
A napuoran; ngem , o, sadin' ti paggapuan
Tartaraudi nga anglem daydi kanta ti kalman?
4.
Addanto panawen ti puor-bakir
A mangbugaw kadagiti pagaw.
Addanto panawen ti sabali a kalgaw
A mangriing kadagiti nagtawataw a tawen.
Addanto panawen ti panagsaludsod
Iti panaginkukuna a kinapudno ken kinaemma.
Addanto panawen ti yaasideg iti altar-simbaan:
Ket iti naliday a pagkararagan
Maysanto a kanta ti mangpirpirsay
Ramay dagiti naunget a darikmat.
Addanto panawen dagiti natinnag a didiosen
Ken natatangsit a managbasol.
Addanto panawen, wen, addanto panawen
Ti tudo, ti gurruod, ti lua, ti katawa.
 |
| Padsan River and Gilbert Bride in Laoag City |
 |
| The Provincial Capitol of Ilocos Norte in Laoag City |
Daniw nga kasla di maamiris no ania ti pudno nga ricna ti inna ibati; pudot ti sinamar ti init iti bigbigat wenno lamiis ti pul-oy iti umadani nga rabii! :) (pinadas ko kano met ah!) But Peter, my friend, the intensity of your poetry captivates my senses - and definitely because the language is Ilokano! I look forward to more please....
ReplyDeleteDios-ti-agngina, Sonja. No dadduma, agsublitayo iti daan a lubong ket mariing dagidi rikna nga iyebkas iti daan a lengguahe a kasla saan nga agbalbaliw.
ReplyDelete