RABII IDIAY GAMU

Nairteng man ti lidem-bengbeng
Umang-anges daytoy nga ulimek
Ket ti adayo a pulikkaaw-riaw
Yegna dagiti aligagaw.
Adu, kunada, dagiti ubbog
Ti dara, dagiti karayan ti lua
A di ammo ti pagpatinggaanna:
Dagiti agbukbukkuar a pungtot
Adda latta pagnguduanda.
Sipsiputan dagiti anniniwan
Dagiti aggargaraw iti kasipngetan
Ket dagiti darikmat ti kamalala
Ti dawel dagiti agpagunggan.

Mamedmedan dagiti katkatawa
Umel-tuleng dagiti sarsarita
Uray ti angin a saan a makatalna
Agur-uray met ti agsapa.

Ti buteng linengngesna ida
Sinno ti agtured a mangsaranget
Iti bala ti kinadangkokda?
Sinno ti agtured a makikadua
Iti natugkelan iti padeppa?

(Kanayon nga agsawar ti patay
Uray iti aldaw, sumrek lattan
Iti ruangan, saan nga agdayaw.
Pumanaw nga awan aniamanna
Inton maibanagna ti panggepna.)

Ket napuskol daytoy a manto
A maakas laeng no agparintumengda
Inton ikkatenda ti sullat
Dagiti lapayagda, inton ray-abenda
Ti abbong dagiti matada
     Inton lapgisenda
Ti punit dagiti ngiwatda
Ket usarenda ti naglati a timekda.*


TI PAKASARITAAN TI AMBATALI

Namin-adun a ginay-atko
Ti agsurat maipapan iti Ambatali
Iti rusodan ti dakkel a balay
Ti danum idiay Magat.
Ngamin no agsasarita dagiti lallaki
Sadiay, agalingasaw ti basi ti Piddig,
Maluktan burnay ti tagapulot ti Sarrat.
Adda dagiti nasipnget a rabii
Ta kas iti Laoag ken Vintar mairasion
Ti silaw ngem uray no naulimeken
Adda latta samiweng-Ilokano.
Tunggal ipasiarko ni Anib-Israel
Iti igid dagiti tambak ti Oscariz
Adda latta a maisallin iti isipko
Daydi sangadakulap a talon nga inlako
Daydi tatang iti ballasiw-karayan.
Uray no kasla tumaud ti init ti init iti laud
Ken lumnek iti daya,
Adda latta ti kararua dagiti ili
Ti patneng kadagiti sagibo
A kanayon nga agtunglab a kumita
Kadagiti daan a pasdek a ti Paoay ken Batac
Wenno dgiti rebba ti Dingras ken Davila;
Dagiti pagpallailangan ti Gabu, Calayab,
La Paz, Currimao, Pasuquin, Saud iti Pagudpud.
Ket sibibiag dagiti bantay ti Marcos ken Nueva Era
Ken ti nabaneg a rangtay ti Padsan!
Diak pinanawan dagiti pagaw ti Nalbo ken Darayday
Ken ti bang-i ti Santa Maria.
Dayta laeng ta adda panagalinggaget
No umadakka kadagiti naiputputong a turod:
Saan a kasla idiay Banna
A mabalinmo a di ilittad ti agdan.
Ditoy, uray no agapoka
Adda latta atap kadagiti mata,
Agallingagda sakbay a sumungbatda.*



*Nairaman iti antolohia dagiti dandaniw iti Ingles ken Ilokano, "Umayka Manen, Ganggannaet/Come Again, Stranger."