"Life is not measured by the number of breathes we take, but by the number that takes our breath away."--Maya Angelou
Kas iti dalluyon nga agapon iti malem
Agsublitayo latta iti taripnong ti kalgaw
A maladaga manen ti kigaw a sirmata iti aringgawis.
Kasano ngamin a pumusay ti saan pay a naipasngay
Iti awan patinggana a panagsapul iti dayag?
Nalmes ti dungsa iti kape ti linnagip iti baet
Ti saan nga aggibus a dung-aw dagiti dalluyon
Iti pannakapespes kadagiti darikmat iti tinawen
Nga isusuknal iti bukodtayo a siudad ti Jerusalem.
(Iti daytoy a rabii, nalipatanda daydi immuna a balla
A nangtiliw ti kararua ti daniw ti samiweng ti gunglo
a pinutarna.
Apay a nagsayukmo ni Manang Ising?)
Kas kadakayo, ammok laeng daydi apuy a simgiab
Idiay Sison ni Apo Turing a nangsilmot met kadakami
Kadaydi Lina ni Gene, da Binot, Virginia, daydi Jimmy.
Ammok laeng ti areng-eng dagiti kutibeng a nangngegko
Kadaydi Manong Pel, daydi Apo Godo, Manong Viring--
Isuda amin a simmina a saan man laeng a nagpakada.
Apay ngamin, aya, daytoy maulit-ulit nga isasarungkar?
Saan a mapaksuyan dagiti mata uray no kuridemdemen?
Adu latta dagiti saludsod a tawataw dagiti sungbatda.
Iti lugan nga agawid, awan ti arimekmek a kasla ketdin
Sangsangalen ti sarita/daniw iti adu a bariw-as, panagbirok
iti dayag ken imnas
A maisaang iti karaang ti ab-abbi, patiray-ok wenno
Panangitan-ok ken kantiaw iti sumaruno a panagkikita.
* Not included in expanded version of Ilokano-English anthology, "Umayka Manen, Ganggannaet/Come Again, Stranger."
No comments:
Post a Comment