Mayalnag iti daytoy a kalgaw ti Severino V. Lacar Iluko Literary Awards nga esponsoran dagiti agkakabsat a Lacar, sigud a taga-Bacarra, Ilocos Norte, ngem agnaeddan idiay Canada ken Australia. Mismo a ni Franciso, sigud a mannurat iti Bannawag, ti mangipakaammonto dagiti pagannurotan iti tinawen a gunggona bayat ti panagtitimpuyog dagiti kameng ti Timpuyog dagiti Mannurat iti Iluko iti Filipinas idiay San Fernando, La Union.
Iti e-mailna iti Timpuyog Journal,mamindua iti makabulan a magasin ti TMIF, kinuna ni Francisco a maisentro iti daniw ti umuna a tallo a tawen ti pasalip. Kinunana nga aganay a P22,000 dagiti gunggona para iti tallo a major awards. Pagsasaritaanto dagiti kameng ti Hunta Directiva ti TMIF no mano ti gatad ti umuna a gunggona, maikadua, ken maikatlo ken no ania a kategoria dagiti mabalin a makisalip.
Ngem kinuna ti maysa a kameng ti TMIF Hunta, a para kadagiti agsursurat iti daniw iti Timpuyog Journal, subscriber iti magasin, ken campus writers ti nasao a pasalip. Qualipikado kano dagiti daniw a naipablaak iti Timpuyog Journal sipud Enero 2012.
No comments:
Post a Comment