NO APAY A DIKA SINUNGBATAN

para ken ni V


Kimmalay-atak iti bantay
Tapno lagipek dagiti bambanti iti sardam
Kimmalay-atak iti sagumaymay
Dagiti tarumpingay
Tapno lagipek dagiti adu a pannakapaay
Ken dagiti litania dagiti balikasmo
A pimmusay apaman nga inda naipasngay!

Dagiti balikas, ay, dagiti balikas!
Natademda ngem anian ta nagrupsada
A nangtirtiris iti naamo a rupa.
Ket naminribu a napasagak iti ammiris
Ken alimbasag iti parbangon--

Diakton sarungkaran dagiti kayanga
Wenno kitaen dagiti maris ti malem.

Diakton ukagen dagiti balemben
Wenno pasgedan ti dapo ti temtem
Ket sapulek manen ti pagaw
a pimmanaw sadiay Darayday.

(Anansata, uray isuda nga agkari iti bulan
Masimbalud met dagiti dilada iti basingkawel
Ket ang-angaw dagiti arapaapda kadagiti lingka
ti daga.)

Kimmalay-atak iti bantay
Tapno lagipek dagiti bambanti iti sardam.
Kimmalay-atak iti sagumaymayko
Tapno maagasanak iti pungtot
ken adu a sugatko.

naipablaak iti bannawag, maysa kadagiti daniw a nairaman iti "Umayka Manen, Ganggannaet/Come Again, Stranger," an English-Ilokano poetry anthology by Peter La. Julian, launched in May 2016 in Currimao, Ilocos Norte during an Ilokano international conference.