DAGIDI II

Sabali daydi nga urnos:
Ti bullalayao maibaskag iti agmatuon,
Agtubo ti rosal kalpasan
Ti arbis iti kapanagan, dagiti kali
Agtaytayabda kadagiti sanga
Iti igid ti karayan, al-allilangagenda
Dagiti pisaw-pisaw, dagiti kawwetda
Daradara iti nalabon nga apitda.

(Lamolamo pay la ti danum, timbeng
Ti makapuor a kapanagan.)

Adda dagidi nagdakiwas a nangsindi
Iti apuy kadagiti naangrag a ruruot
Iti rimmuong dagiti nalayog a sagat
Kadagiti patad ti Sierra. Naginnunakami
A nangbugaw kadagiti pagaw tapno mariing
Dagiti matmaturog iti kalapaw, nagtabbaawkami
Ngem nagtalinaed dagiti timekmi iti angin.
Asino ti makalagip kadagiti rupada
A kalanglangami uray sabali ti sao ken tebbagda?
Nagpukawkami met a kas kadakuada iti kabakiran
Dagiti arapaapmi a maisupadi iti sinurotda a dana.

Nagpaingan dagiti pagaw wenno napasagda met
Kadagiti ranget idiay San Mariano?
Wenno naungawda idiay Balbalasang ken Santa Marcela
Nga adu ti padeppa nga awan naganna?

Nabuddak man dagiti paddak
Nga agturong iti naraber a bakras
Ket addaka sadiay, Kabsat,
Nga agnanayon nga agur-uray iti ubing a bulan.

Apay a saan a nagsubli dagiti kali idiay Padsan?
Wenno idiay Santa Maria ken Darayday?
Adda laeng dagiti makatitileng nga ulimek.

Ket naliday latta dagiti timekmi iti angin.

Nagturongan ngamin dagiti baresbes?
Ayan dagiti dissuor ken perroka?

Imbes ng agkaemka, Sugat, agpadaraka, ket itag-aymo
Manen ti gemgemmo kadagiti nangiliktad iti agdan.
Dagidi rinaraemtayo iti adu a basingkawel
Naikkat dagiti abbongda: agnunnunog dagiti mortal
a sakada kadagiti inigges a tarigagayda.

Wen, agpadaraka, Sugat, ket lagipem ti dayag
Ti agsapa idiay Maan-anteng, uray idiay Pinsal.
Kurengrengem ti kutibeng ket sangitam dagiti dallang
Iti kannag.

Ay, dagiti dallang, awandan!
Ay, dagiti daan a samiweng nagrupsadan
Iti tirtiris dagiti didiosen a kinideman
Ti langit.