NAGSAOAK, NGEM DIKA DIMNGEG/I SPOKE BUT YOU DID'NT LISTEN*

para ken ni virginia

Kastoy ti pakasaritaan: agsaksika
Iti pannakabugaw dagiti pagaw, ikur-itmo
No kasano a nalusak dagiti rosal
Iti kalgaw, ti allilaw-sugat a dida nakita.
Natingra ti dara iti kadaratan, ti angin
Nagsayukmo idi intalawda ti dayawna.
Pito a tawen kalpasan ti panagbasakda
Saan a natay,
Ket dinto mapunas iti Libro,
daydi immay nga elehia, dagidi nagputar
nagrairada iti nasantuan a daga, isuda ti bannuar
ta ti kararua
angrag a let-ang a kas iti Susuan, nakitam,
nasay-upmo ti bang-i. (Nasapaka ngamin
A pimmanaw, dimo naawatan
Ket ti lagip maysa a naulimek a karayan.)
Kasta ti biag a kas iti krokis
Ti daniw iti basikaw a bulan.
Adda dagiti saan nga iyabel,
adda dagiti lipaten--petsa, dung-aw, pungtot,
panaginkukuna, panangliput, panangrames
iti agmatuon--
ta nasken ti iyuuli
iti padeppa
Iti nangatngato a tukad dagiti arapaaptayo
Iti Imnas a kasapulan latta nga imdengan
Uray iti panawen ti panagpagunggan.


*memoria iti basingkawel dagiti mannurat idiay suso idi abril 2005
uray no narugit daydi nga eleksion, ibagbaga ti mannurat a lipaten
dagiti saan a napintas a pampanunot ken rikna a pinarnuayna gapu ta kasapulan
latta a denggen ti Mutia (Imnas) "uray iti panawen ti panagpagunggan."
nairaman iti antolohia dagiti dandaniw nga Ilokano ken Ingles, "Umayka Manen, Ganggannaet/Come Again, Stranger."

Bannawag, Disiembre 12, 2005