TI MATA TI LUBONG*

Ti mata ti lubong a mangmatmat kenka
isu met laeng ti mata nga adda kenka
nga umimatang iti lubong ken iti dayawna
ti dara ti daga a mangted iti biagna
isu met laeng ti dara a mamagpitik
kenka iti tengnga.
ti agsayasay kenka isu met laeng
ti agsayasay iti daga--wen, ti agparukpok
saan a maawanan iti parukpok.
ti init a balangat ti lubong isu met laeng
ti balangat a naisaad iti bassit nga ulom
saan a sarsarita idi ugma dagitoy a nakem.

Ngamin, kas iti daydi a panawen
ti Uleg ken ti Mansanas
idi nabukel dagiti krokis ken pagrukodan
nailansatayo iti padeppa iti ikub ti basikaw
a saanto nga agpukaw.
Kas idi naipasngay ti maladaga
dagidi dagensen ken am-amangaw
kasta met ti rugi ti awan patinggana.
kas met iti agnanayon nga awan
kanibusanan iti sangariwrw nga arrabis,
iti adu nga amen ken sakit ti nakem.
Ken, wen, kabsatko, awan ti mailemmeng
ta kas iti taaw a mangliwengliweng
nakalawlawag ken agtaytayyek ti apuy,
ti mulagat iti kangatuan.

*Nairaman iti expanded version ti "Umayka Manen, Ganggannaet/Come Again, Stranger"