Kasla nataldeng a baka
A sipaparnged iti igid
Ti sibilisasion.
Kabsat ti tapok ken bato,
Aguyas tunggal agsaraaw ti tianna
Iti gumayebgeb nga agmatuon:
Yahwe, Yahwe, isublim ti Paraiso!
Ngem awan ti maisubli kenkuana
Ta awan ti napukawna.
Ti Paraiso isu ti templo
Ti narukop a bagina.
Dinanto ammo, dinanto maawatan
Agingga a perngenna ti naputolan
Nga init ket anagenna:
Dagiti sabong! Dagiti sabong!
Awanen ti marisda!
Nalabit nga addanto sungbat
Ngem mabibineg latta ti utek
Ket agsubli iti lubongna.
Kasla nataldeng a baka
A sipaparnged iti igid
Ti sibilisasion.
*Nairaman iti "Umayka Manen, Ganggannaet/Come Again, Stranger"
No comments:
Post a Comment