Again, Stranger", an anthology of Ilokano and English poems:
1.
Idi un-unanana nga aldaw, napan dagiti ubbing,
agsasarunoda, iti karayan tapno ugasanda
dagiti sugatda a nagrukrukit iti basura.
Nagturong met dagiti dadakkelda iti karayan
Saan a tapno agkalapda no di ket balnawanda
Dagiti gaddilda. Karsanda ti kadaratan ket arub-ubaenda
Ti narituer a danum iti napalalo a wawda.
Naulit-ulit ti isusuknalda--annak, dagiti nagannak--
Ngem saanda a nagsasabat iti dalan
Tunggal agawidda a nabang-aran iti apagbiit
Iti riniwriw a saem ken dagensenda.
Ket naggibus ti sarita
Iti ulimek dagiti kararag ken liday
iti adu a kalsada a nagkalkallautanganda.
11.
Idi un-unana nga aldaw, agpampanunot ti reyna
Iti uneg ti dakkel a balayna; no kuan sipatenna
Ti nalawa a mugingna: kasano a yalisna
Dagiti mohon tapno madippit iti dangro
Dagiti tagabo ti daga?
A, mangliwengliweng ti pagpastoranna,
Saan a parikut ti pannakailawana.
Idi kalman, pinamigatna dagiti pasurotna
A pannakabagi dagiti lingka
Namutttitda, pinabalonanna pay ida
Iti sagggaysada a punggos ti nalangto a pagarabanna.
Ay, bay-am nga aglaaw dagiti kutokuto
Iti ruangan ti balay iti kaasi!
Bay-am a mangurat, matay-iti-apal
Dagiti nagabito, uray dagiti agimpapadi!
Dumsaagka iti trono, bassit a babai? Hahaha.
Saan pay a naggibus ti sarita.
Adda pay sangaribu ket maysa a rabii
Ti balbalatong-allilaw-am-angaw iti daga.
No comments:
Post a Comment