(Para ken ni Grace Padaca)*
Siasino ngamin ti makalagip
Kadagitoy a bambanti? Dakami
Laeng a lingka ti daga,
Dakami a mangyarado ti bagbagimi
Iti agmatuon idinto nga agkatkatawa
Dagiti agturay iti imeng
Dagiti palasioda iti tangatang
Idiay Manila idiay Baguio
Idiay Tagaytay, idiay ballasiw-taaw.
Siasino ti makalagip kadaydi nasipnget a rabii
Idiay Angadanan ken San Isidro
Idi rinumekda dagiti sagrado
A pangngeddengmi?
(Ay, dagiti natadem a kawwet
Ti basingkawel pinisangpisangda dagiti balota
Iti atiddog a pasilio ti bilegda!)
Kasapulan nga agkantakami
Ngem uray kadagiti bambantay
Saan a mabilang dagiti maligsay
A tarumpingay ket alimbasagenkami
Iti adu a dissuor dagiti barukongmi.
Nalpasen dagiti ublag ken tirtiris
Ta nasarakanmi dagiti timekmi
Ket sangsangkamaysakami a nangyebkas
Kadagiti rabngis dagiti kalinteganmi.
Ita, mabalinmi a panawan dagiti balaymi,
Dagiti agdan iti sanggir dagiti kawayan
Dayyengenmi ngarud ti duayya ti namnama
Ken wayawaya
Ket ti balligim isu met ti samiwengmi.
*Published in the Ilokano magazine, Bannawag. One of the poems of the expanded version of the Ilokano-English anthology, "Umayka Manen, Ganggannaet/Come Again, Stranger" with critical introduction by Dr. Aurelio Solver Agcaoili of the University of Hawaii at Manoa.
No comments:
Post a Comment