iti puraw a nagkuentas iti krus
iti singkit uray idi panawen ti maro
iti sakang a mannakigubat
iti mannursuro iti rang-ay ken damsak.
Apay a nagkayangka lattan?
Tunggal guyodendaka iti kasipngetan?
Mano met ti imbayadda?
Apay a dika nakitinnawar?
Laglagipenka a naumbi a kanta
Iti paludip ti init
Iti panagsangpet dagiti kayumanggi
A mangngalap a napan nakiginnasanggasat
Iti adalem a rabii iti taaw
A pasaray yegna ti adu a lunod
A tabbaaw ken am-amangaw.
(Kasano, aya, ti agsaludsod
A dika agsayukmo a kasla ketdin
Awan mamaay dagiti datonmo?)
Naragsakka kadi kadagiti nakaisadsadam
Iti makapuor a kapanagan
Iti tumulang a kaniebean
uray iti agnanayon a rabii
iti umsi ken leddaang?
Ay, nagbati dagiti malalaki
Iti pandiling dagiti kunggangi a babbai
A mangsissisip iti bugi dagiti bannog.
Apay a dadaelenda ti panawenda
Iti sanger ken sugal ken diskutir
Dagiti bagtit iti sardam?
Nalabit a nagammiriska met
Anansata limned dagiti aligagaw
Iti ginget dagiti ibit dagiti ubbing
Iti saraaw ti bigbigat, isuda nga agrukit
Iti basura iti taraon a sabidong
Dagiti maipasngay nga arapaapda.
Ket dagiti mangikarkari iti narabuy
Nga agsapa mabalbalatongda latta
Iti basingkawel idinto a lumuklukmeg
Dagiti agin-indayon a kamalalada
Iti ikub dagiti palasioda.
Ania ngarud itan iti umuk-ukuok a bisin
Ken rumiet a kinapanglaw iti labes
Pugsaten manglenglengnges a a tanikala
Wenno agtalinaedka a naumbi a kanta?
*Nairaman iti expanded edition ti "Umayka Manen, Ganggannaet/Come Again, Stranger"
No comments:
Post a Comment