 | ||||||
| Marina Bay Sands, the world's second biggest casino (top and bottom photos by the blogger) |
BALAY A BALITOK ITI BAYBAY
Balitok-diamante iti rusod ti sabangan
Wenno gabsuon ti pirak ken sirib
Ti Lumaud? Ti Dumaya?
Ania ti pampanunotek, St. Henrick*,
Iti rimatrimat dagiti eskaparate,
Iti bitekbitek a gubbuay dagiti Asiana
Nga imnas a daeg ti pasdek?
Wenno annayas ken pisaw-pisaw dagiti gaud
Ti banka iti inaramidda a karayan
Iti pamuon, katkatawa dagiti naglugan?
Kasano nga iladawan dagiti kanginaan
A pagorasan, kawes, bangbanglo, taraon?
Uray arak, kalangiking dagiti kubiertos?
Ania ti sumken a rikna?
Gura wenno panangngaasi?
Ania dagiti agay-ayam iti isip?
Ti narsuod a balay dagiti daniw, salaysay,
Nobela ken sarita idiay Suso iti igid ti baybay?
Dagiti rutayrutay ti Sta. Maria ken Darayday?
Dagiti rutap a taeng kadagiti rangtay
Ti Quiapo, uray idiay Santiago,
Dagiti basura, narurugit nga estero?
Anansata, awan kadagita, ay, awan kadagita.
Iti daytoy a suli ti lubong a kankanayon
Nga aldaw, adda kadi umno a saludsod?
Ania koma dagiti dillawen ken amaden?
Adda kadi rituer iti korona-alahas a partuat?
Awan, uray aligagaw; arakupen laeng ti ulimek
Ti panagdayaw no di man ketdi panagsiddaaw.*
*St. Henrick Juan Julian, 6, Isabela, Philippines
Marina Bay Sands, Singaporee
February 15, 2013
*Included in the new edition of "Umayka Manen, Ganggannaet/Come Again, Stranger", with introduction by Dr. Ariel Solver Agcaoili of the University of Hawaii at Manoa.
No comments:
Post a Comment