DANGADANG

Agarigenggen dagiti samut-samut iti alipaga
dagiti balikas, balikas, balikas.
Anian nga ab-abbi, anian a kalintegan!
Uray dagiti mongha agalumiimda a rummuar
iti puraw a sudida.

Siaasut ti kampilan iti rinnupak dagiti nagabungot.

Adda kadi pannakasubbot iti rikkiar
kadagiti binnatog ti pungtot?

Umno koma nga agsisinnakittayo
ta ngamin saan aya a ti berdugo
isu met laeng ti dasig dagiti anniniwantayo?

Saan kadi koma nga ipeksa ti rikna
kadagiti balikas, balikas, balikas
a nagsusuon iti bendision ti sirmata
ken panagmaymaysa?

Ket iti rangrangkay dagiti darikmat
siasinoda a natnag iti allilaw ken am-amangaw?
Ania ti kari dagiti ulimek
wenno subbot ti adu a panaganus
no di man panagpangas?

Itag-ay dagiti kusapo a wagayway
nga uloden dagiti dagiti tirtiris ken saan a naimbag
a pakinakem iti bettak dagiti katawa, ublag,
saringgayad dagiti umsi, ulbod nga isem.