TI KALIDAYAN A DANIW

NI PABLO NERUDA

Patarus ni Peter La. Julian ti "The Saddest Poem/I Can Write the Saddest Lines Tonight".
Maysa ni Pablo Neruda kadagiti kalaingan a mannaniw ti lubong. Recipiente ni Neruda iti Premio Nobel ti Literatura.

Ita a rabii, makasuratak iti kalidayan a daniw
Kas pagarigan, isuratko, "Nakarangranga ti rabii,

Ket agarigenggen dagiti asul a bitbituen iti adayo."
Agkanta ti agrikusrikos nga angin-rabii iti law-ang.

Ita a rabii, makasuratak iti kalidayan a daniw.
Nagayatak kenkuana, no dadduma inayatnak met.

Idi, kas itoy a rabii, makasuratak iti kalidayan a daniw.
Namin-adu nga inagkak iti sirok ti awan patinggana a langit.

Inayatnak met idi no dadduma, ket inayatnak met.
Kasano nga awan ti agayat kadagiti naulimek ken mangnibinibi
a matana?

Awan kadi mamaayna no napaay ti ayatko a nangigawid kenkuana?
Narnuoyan ti rabii iti bitbituen ket awan iti sidongko.

Ita a rabii, makasuratak iti kalidayan a daniw
Ammok nga awan iti dennak. Riknaek a napukawko.

Denggek ti mangliwengliweng a rabii nga ad-adda a mangliwengliweng
iti kaawanna.
Matnag ti daniw iti kararua a kas iti pannakatnag ti linnaaw
iti karuotan.

Diakon ay-ayaten, awan duadua, ngem inay-ayatko
Ti timekko sapulenna ti angin a mangsagid iti lapayagna.

Addanto sabali a mangtagikua kenkuana. Wen, addanto
a kas iti panangtagikuak idi kadagiti agekna.
Ti timekna, ti nalap-it a pammagina, dagiti saan a
matukod a matana.

Dayta laeng, awanen. Iti adayo, adda agkanta. Iti adayo.
Agtawataw ti kararuak, ket awan isuna iti sidongko.

Birbiroken dagiti matak, kasla yasidegda kaniak
Sapsapulen ti pusok ket awan iti dennak.

Isu met la a rabii purarenna dagiti isu met la a kaykayo.
Dakami. Wen, dakami. Saankamin a kas idi.

Gapu kadagidi a rabii, kas itoy, inikutak kadagiti takkiagko.
Napukawko ti imnas, saan a pulos nga agtalna ti kararuak.

Uray no daytoyen ti maudi a saem nga ipalayna
Ket daytoy metten ti maudi a daniwko kenkuana.