DUA A DANIW A DI NAIRAMAN ITI "UMAYKA MNEN, GANGGANNAET/COME AGAIN, STRANGER"

panaas

Umarubayan dagiti laglagip
iti kasaor ti malem-sardam
idiay Laoag, ditoy Menifee
iti batog ti kidem a langit:
karkarsanna idi ti kadaratan
iti baet ti saraisi ti paraupo
alaenna ti buyuboy, kil-awanna
sana takuen ti litnaw a yallatiw
iti agar-arimasa a malabi. idi kuan,
ballasiwenna ti karayan, ti imnas
a nagduanig, umis-isem ken nagsusuon iti
nasam-it a danum ni ayat--
daytoy ti kaudian nga am-ammangaw,
alimbasag ken tarimbangon
dagiti palimed ken naliday a dandaniw
a mariing kadagiti ulila a parbangon.

***
dagiti saning-i ti sierra*
(para ken ni grace padaca iti pannakapilina a gobernadora ti isabela)

siasino ngamin ti makalagip
kadagitoy a bambanti? dakami
laeng a lingka ti daga,
dakami a mangyarado iti bagbagimi
iti agmatuon idinto nga agkatkatawa
dagiti mangituray iti imeng
dagiti palasioda iti tangatang
idiay manila idiay baguio
idiay tagaytay idiay ballasiw-taaw.
siasino ti makalagip kadaydi a nasipnget a rabii
idiay angadanan ken san isidro
idi rinumekda dagiti sagrado
a pangngeddengmi?
(ay, dagiti natadem a kawwet
ti basingkawel pinisangpisangda dagiti balota
iti atiddog a basilio ti bilegda!)
kasapulan nga agkantakami
ngem uray iti bantay
saan a mabilang dagiti maligsay
a tarumpingay ket alimbasagenkami
iti adu a dissuor dagiti barukongmi.
nalpasen dagiti ublag ken tirtiris
ta nasarakanmi dagiti timekmi
ket sangsangkamaysakami a nangyebkas
iti luksaw ken pungtotmi
kadagiti rabngis iti kalinteganmi.
(Uray no dagiti sayukmo ti rikna
ibatadna met ti kawaw a kararua,)
Ita, mablinmi a panawan dagiti balaymi,
dagiti agdan iti sanggir dagiti kawayan.
dayyengenmi ngarud ngarud ti duayya ti namnama
ken awyaway
ket ti balligim isu met ti kantami.


*naipablaak iti Bannawag, aglinawas a magasin dagiti Ilokano