Nagasatka, lakay.
Panawen ita ti uleg
Kasinsin ti kuton
Dagiti kalapati
Ken rumkuas ti bagio
Ken allawig.
Anian a pintas, daeg
Iti tapaw dagiti bantay.
Anian a gunggona
Ti sangatersia nga agawa:
Maysa a kontrata
Agingga nga aggargarawka
Iti rabaw ti daga.
(Dida la ketdi apiten a masapa
Ti Chivas Regal ken Larkmo.)
Rebbengna a maidayaw
Ni bossmo:
Inimdenganna ti kantam
Ken dagiti sagut
Ni kasimpungalam.
Nagdissoda iti nalukneng
A paset daytoy a parsua
A ti isipna ababaw
A kas iti bubon-kastila.
Iti mabiit bumagunton
Ti palasio ti darepdepmo
Ket makisalipton
Ti stereo ken telebisionmo
Kadagiti riaw ken ariwawa
Dagiti dungrit nga ubbing
Iti nakayanakam a kalsada.
(Ania ngata ti sumaruno
Nga aramiden ti tao
Kalpasan ti idadanonna
Iti lubong ket makitana
Dagiti kinawaengna?
Agsurat iti pakasaritaan
ti biagna, iti libro a tapoken
Iti maysa a suli ti bassit
a biblioteka?)
Nagasatka, lakay
Panawen ita ti uleg
Kasinsin ti billit ti bato
Bumtak dagiti bulkano
Ket maipasngay dagiti nalungpo
A maladaga a naikari
Nga umuli kadagiti tronoda.
No comments:
Post a Comment