POEM IN THE ANTHOLOGY, "COME AGAIN, STRANGER/UMAYKA MANEN, GANGGANNAET"

PANNAKARARIT

Impideg ti lalaki
ti de-pilid a tugaw
     iti puraw a diding
     ket inuraymi ti naituding
     nga oras.

Siak a mararit
     addaak met a situtugaw 
     iti trono ti naparmek.
Nagsasaruno nga immagibas
     dagiti dimmaga
     iti daan nga ili, iti daan
     nga urnos, uray daydi darepdep
     a nagkunaak a bayadak
     ti utang ti kasimpungalan.

Ama, mangaasika
O Apo, mangngaasika.

Ket nalang-abko
     ti nalabaga a rosas
     nga am-ammalan ti umis-isem
     a timman-aw manipud iti ayanna.

Inggalutda dagiti imak
     iti padeppa
     a nangipaiddaanda kaniak.

Ingatom ta sakam, kinuna
     ti siaabbong iti agongna
     ken nagkawes iti berde
     a kas kadagiti dadduma.

     Ngem agbibinegakon
     kadagiti adu a tudok ken sapsapo.

     Linuktandak iti asideg
     ti sellang ken ti lamiis
     ti kaippasngay a parbangon
     ti tarimbangon.

Dagiti lallaki a nagabito
     gineppasda dagiti pempen
     ken basbasolko.

Nalpasen, inyarasaas ti Bibig
     a ti inyesngawna
     isu ti sang-aw ti agturay
     a saan a makita.


Baguio general hospital
abril 9, 1997