DAGITI MABATI KALPASAN TI PANAGALLAALLA*

Daytoy panagbirbirok iti sangamalabi a balitok
Daytoy panagbirbirok iti  madaydayaw nga aglablabonan
Daytoy panagbirbirok kadagiti tawen idiay Darayday
Daytoy panagbirbirok iti sabali a sangladan
Panagbirbirok kadi iti awan kaes-eskan?

Idiay Honolulu, binirokmo kadi ti init iti laud?
Ania't binirbirokmo kadagiti basura iti nailet a kalsada
Ti Waimanalo? 

Nadlawmo kadi ti lalaki a nangitanggaya
Ti imana iri ruangan ti Dimsum kalpasan ti pannangan?
Inwagaywaymo kadi ti imam a kasla addaka idiay
Quiapo tunggal asitgandaka dagiti lingka ti daga?

Ania ti pampanunotem idi ballasiwem ti kalsada tapno
Agluganka iti Honda Civic iti asideg ti poste idiay Keolu?

Ania ti insaom iti babai a kimmablaaw kenka idi agbirbirokka
Iti tarong ken paria iti gumpong ti nateng idiay Dong Phung?
Impagarupna kadi a sika ti kasinsinna a gapgapuna idiay Laos
Wenno Vietnam? Napartak dagiti balikasna a kas iti kapartak

     dagiti agpagunggan a kabalio nga agtartaray iti akaba
a kalsada ti Amarillo
           a dumanon idiay San Francisco.

Hey! Ririawannaka kadi ti babai a nakapantalon iti nakipet
Itay impaturongmo ti kamera iti ngatuen ti kayo a malabsanna?
Wenno nangngegmo ti bukodmo nga ikkis iti baet dagiti taul ti aso
Iti darepdepmo no sumken ti bangungotmo iti parbangon?

Awanen niebe a nayaplag a kas puraw nga ules iti karuotan ti parke
Awanen dagiti nakalamlamiis a bigat ken malem, dagiti makabibineg
Nga angin iti dan-aw a naed ti ginasut a pito ken agtaytayab a ganso:
Anian a kiakkiakda iti maregmeg nga ipurpuruak ti Puraw a baket.

Sumipngeten, napudno a gayyem, tumakderkan ketdin ket magnaka
Iti sikko-sikko a dalan nga agturong iti awang a balay a pagur-urayan
Libro a ginatangmo idiay Wal-Mart: basaem manen ita a rabii bayat
Nga agagawa dagiti kayumanggi, ti kudilda ngumisngisit iti gayebgeb
Ti init iti pagilian a napnuan namnama, arapaap,  adu a pannakapaay.

*Included in the expanded version of the Ilokano-English anthology, "Umayka Manen, Ganggannaet/Come Again, Stranger"