RAY-AB

Agarigengen dagiti samut-samut iti alipaga
     dagiti balikas, balikas, balikas.
Agar-arimasa iti apas dagiti kunada a biktima
     dagiti nagmanibora iti gunggona.
Uray dagiti mongha agalumiimda a rummuar
     iti imeng ti puraw a sudida.
Dagiti agid-idolo kasda la bagtit a bakes
     nga aglagtolagto iti ragsakda.
Sapsaplitenda ti bagbagida iti ray-ab
     a dayaw dagiti bangolanda.
     (Ay, ti gameng inkalida kano
      iti pamuon ti patta
        idiay Santa Maria.)

Siaasut ti kampilan iti rinnupak
     dagiti nagabungot.
Adda kadi pannakasubbot iti rikkiar
     kadagiti binnatog ti pungtot?
Umno koma nga agsisinnagutayo
     ta saan aya a ti berdugo
Isu met laeng ti dasig dagiti anniniwantayo?

     

Saan kadi koma nga agipeksa
kadagiti balikas, balikas, balikas
a nagsusuon iti bendision ti sirmata
  ken panagkaykaysa?

Ket iti rangrangkay dagiti darikmat
     sinnoda a natnag iti allilaw
     ken am-amangaw?

Ania dagiti kari ti panagulimek
     wenno subbot ti adu a panaganus?

Itag-ay dagiti kusapo a wagayway
Uloden dagiti tirtiris ken ublag.
Putden ti saringgayad dagiti umsi
     idinto nga itanem dagiti kumpay
     ken tikap nga isem.