(Para ken ni Manang Pacing)
Bessag ti basikaw a bulan
Aggargaraw dagiti anniniwan
Iti naulila a kapanagan.
Makaipas dagiti lagip:
Dagiti nalamiis a turod
Idiay Samoki ken Sagada
Ti karayan iti uneg ti daga
Idiay Palawan, dagiti orkidia
Idiay Davao, dagiti agila
Idiay Sierra, ti batonlagip
Idiay Batac: daytoy ti bannawag.
Anastacia, agsaoka
Kasaom ti bulan
Kasaom ti lunod ti bulan
Kasaom ti samiweng
Kasaom ti saem ti samiweng.
Anastacia, agsaoka koma
Diak maitured nga imatangan
Dagiti agarimayang a lua.
Wen, dagiti sagibo, dagiti sagibo!
Pimmanawda iti sidongta
Nagpakadada met, Anastacia.
Ay, nakalawlawa ti salas
A nagay-ayamanda idi, ay!
Naliday dagiti lukat a tawa
Agsasaibbek ti agdan
Agsangsangit ti dap-ayan
Mangngegko dagiti timek
ken katkatawada
Ngem nairteng ti manto
ti ulimek kadagiti kuarto
(Agsayukmo met nga agsubli
Dagiti balikasko.)
Sapulenta kadi ida
Ket inta kadagiti adayo a daga?
Ngem sadino ti pagbirokanta?
Dita ammo dagiti lugar
a nakaiwaraswarasanda.
Kasano a pabsublien ida
Ket nakaro ti bisin ken rutayrytay
Ti Santa Maria ken Darayday?
Bessag ti basikaw a bulan
Agsaoka, Anastacia, agsaoka.
Kasaom ti bulan.
*Nairaman iti expanded version ti "Umayka Manen, Ganggannaet/Come Again, Stranger"
No comments:
Post a Comment