LETTER FROM THE GARBAGE OF MEMORY(4)

DIOS- TI-AGNGINA, APO MANNANIW No basaek ni Peter La. Julian: sipatek/ti muging a makalagip a nagkulagsit/ti dilak iti pait ti ostia iti panangmulmulagatko/iti siding iti timid ti padi (kaing-ingasna/ti galante a sangkaestoria ni JP, gayyemko/nga aldaw no maturog); iwekwekko ti lapis/iti sinipet a 'CCC'* a makapanunot no ania/ti nakem ti Dios tunggal agbayakabak/sa layusenna ti Metro Manila bayat ti panagtikag/ ti Negros ken Samar: agallangogang ti diskurso/ ti babai a nagindidi sa nagbabawi; kunesek ti papel no mabuybuyak pay laeng/ ti panangrasaw ti pastor iti pastor met laeng/a nangitalaw ti arapaap ti adalanna/sa agtilmonak iti sukog ti starlet/a nangipukkaw: 'Stop the war, not peace!/ Ay.../ No kuan ngaretngetek ti nagdawadaw/ kuko ti pattugangan: mailiwak sa/nga agsikkawil ken agsagawisiw iti bukot/ni Sawak sa, no kua, abogek dagiti billit-tuleng/a mangtaktak iti panagkanabsuorko/a lamolamo iti alikuno ti alinuno./No basaek manen ni Peter La. Julian:/itangguapko ti ingel ti tasa sa agrupangetak/(aggarikgik ti saltek a nakaipadigo/manen ti rugit) a makaammiris/a natalingengen ti nakem a kadinnanggil/ni Michelle a mangperreng iti maris ti malem/iti aplaya ti Tallag wenno kabisilan ti pateng/ngem ti agdaniw a kas Peter La. Julian.../Ariel S. Tabag