DAGITI BARO A TIMEK-DANIW ITI AMIANAN

Iparangmi ditoy dagiti daniw a gapuanan dagiti estudiante kadagiti kolehio ken unibersidad iti Amianan. Naadaw dagitoy a daniw kadagiti literary folio a naisalip iti tinawen a Higher Education Luzonwide Press Conference a pagtitiponan dagiti campus journalists ken writers iti sibubukel a Luzon agraman dagiti probinsia ti Palawan ken Mindoro. Masansan nga aglektiurkami iti daniw, editorial ken salaysay kadagitoy a pasken. Pinilimi dagitoy ta mamatikami a mabalin a yabay ida kadagiti gapuanan dagiti nakaipablaaken iti Bannawag.


MASSAYAG

Rommel Pascua
Mariano Marcos State University
Batac, Ilocos Norte

Agmurmurayka iti piningpining, Sadiri,
Wenno iti kayasakas dagiti mapinggit
A paris-bulong.
Agriingka kadin ta inta manen sekseken
Dagiti nayatang a gasat ta bareng agtong-it
Dagiti maipasngay nga agsapa.
Saan. Saannak koma a turogan
Ta diak la ketdi kabaelan a sungrodan
Ti atong a yur-orta kada Jodi ken Ismael.
Apay, ad-adda kadi a mailibayka
Kadagiti umuli-umulog a danapeg
Dagiti immay nakimassayag a kararua?
Adda kadi duayya kadagiti mailimog a baso ti iliw?
Salsaludsodek iti sakaanan ti puraw a kurtina:
Daegen kadi ti kararag ti rayray dagiti bombilia
Iti uluanan ti balay?
Ay, iti saan unay a mabayag ilibutminton
Ti alibungobong ken ti lungon ti ila
Nga agturong kadagiti puraw a balaybalay.
Ket innakto makimisa iti danggay
Dagiti padak a napanawan.

APAG-APAMAN A RANIAG

Glen C. Hufancia
Divine Word College of Laoag
Laoag City, Ilocos Norte


Kellaat a simmangbay
Salemsem ni rabii
A naulesan daydiay baybay
Iti ulimek ni balligi.

Sumro nga umayamuom
Sam-it dagiti sabsabong
Nadarisay a kasla iti danum
A mangbibiag narurusbo a bulbulong

Pati bulan ket maaspelanen
A mangbulbuli
Rimrimat dagiti bituen
Ken ti nakapsut nga awis ni tagari.

Agingga nga agpakadan
Ti nalidem a nagpatnag
Agraman dagitay pagwadan
A nangtulid apag-apaman a raniag.



ADAL: ALAD WENNO LAAD?

Newton John Rarama
Philippine Normal University
Isabela branch
Alicia, Isabela

Maysa laeng a sao-balikas
A buklen dagiti uppat a letra
No pagsisinnukaten ti urnosna
Makabukel agsisinnupadi a sarita.

Daytoy ADAL nga inted
Nagannaktayo a napnuan kired
Ket bukel ti kinagaget nga immula
A no iti tiempona agtubo, agbunga.
Ket dayta ADAL nga iggemmo
Napatpateg pay ngem piso
A di pulos matakan, nga isu’t pudno!
Agingga a mapugsat ti angesmo.

Iti inka pannakidangadang
Ditoy daga nga adu ti kabusor
Anian a nagsayaat nga ALADmo
Dayta ADAL a gupitmo.

Ngem no dayta ADAL inaramatmo
Iti kinadakes ken kinakillo
Inusarmo pay a bulsekem padam a tao
Anian a kinaLAAD ti ginALADmo.



LAMENTATIONS TO THE MOON

Javier Duran

Northwestern University
Laoag City, Ilocos Norte

Basho bathed in the light
His house was burned. Nothing left
The Kon Tiki never returns.

The form passed by. I stood there
Idle. A leaf fluttered out of
the canopy.
Virtues abandoned can’t be cultivated
Nor can it be fertile to the barren
Ground in terra incognita.

But I stayed tonight. My windows
Follow you in your journey. You have to leave.

A farewell can’t ease this departure’s bitterness
(I, too, will depart, soon.)

Tepid blooms. And the cricket sounds waning
Diminishes your pace away.

I have seen you, a million photographs.

Emitting nothing, yet I long
To believe you are my Mother.

I need to return, where I came from.

Your solitude is intoxicating.
There will be birth.
I was your son.



KANKANAEY HAIKUS

MArivic Langan
University of the Cordlleras
Baguio City


Kadunduntugan
Sinapon di Kabunian
Pan-ay-ayaman.

Saleng ay kaew
Tinmatakdeg sin gawa
Linong di sey-ang.

Talaw ed daya
Buwan kadkadwaenda
Labi, ragsakda.



DADDUMA A BARO A TIMEK-DANIW ITI AMIANAN

Ipaskilminto ditoy dagiti gapuanan dagiti dadduma nga agdadamo a mannaniw a kas kada Remy Espero Piano ,Derick Thor Yabes, Nexon Agcaoili, Macario Soliven, agraman ni Junley Lorenzana Lazaga iti University of the Philippines Baguio, a nangabak iti umuna a gunggona iti salip ti daniw para kadagiti agdadamo a mannurat..

PRINCESS LV JOY: SIKA DAYDI BATONLAGIP
A NAITALIMENG ITI NATIKAGAN A NAMNAMA

ni Nexon DN Agcaoili


Diak kayaten
a lagipen batibat ti napalabas
ta umukuok laeng daydi a saem
a nabayagen iti appupo ti panawen.

Diak kayaten
a taldiapan anniniwan nalidem a kalman
a ngangibati't apges ken sanaang
iti lansad ti barukong nga itan masmasnaayan.

Diak kayaten
a timuden manen natinggaw a garakgak
daydi libnos, daydi samiweng ni ayat
ta itundanak laeng iti yuyeng
nagmanto, nagpanes a darikmat.

Diak kayaten
a lagipen dagidi tinagibik nga arapaap
nga indatonko iti sakaanam, imnas


to be completed




MAIPAPAN ITI LAGLAGIP ITI KALGAW

Junley Lorenzana Lazaga
University of the Philippines Baguio

1. Cuaresma

Iti naiduma a pul-oy iti naladaw a rabii iti sapa ti kalgaw,
A nakalugan iti traysikel nga inarkilak manipud iti wangawangan ti kalsada
Ti purok a mangitulod iti pagtaengan ti kamang ti kararua a kas anak,
Naiwirwirwir kaniak ti pangta daydi a bet-ang a sinursurot idi dagiti nuang
Nga agitulod iti apit wenno dagiti arimpadek dagiti umudong iti castoy
Met laeng a yirmpo. Nakaskasdaaw man, wen, agpayso, nacascasdaaw
Ta awan ti lagipko iti maysa a bet-ang nga uray pay nakailawlawlawan
Ti bulos a calding iti daytoy nga away a nagtaenganmi iti di pay nabayag!
Adtoy ti tangatsng, ti kabus a bulan, bangbangkag, ti baac a samiweng.
Ket nawatwat daydi balikas a nalipatanen dagiti dapan ti agdama a panawen.

2. Fiesta

Naiyanac ken dimmackelak iti poblacion, ngem adda met (malacsid cadagiti kariton
Ken dagiti kanal a nangrikos iti uneg ti ili) pudno nga ammok ken napuotak
A bet-ang ngem iti away iti sabali a turong ti ili; daydi bet-ang a nagkamanganmi
Idi kamatennakam' ti puraw a baca idi nagsursurkamin nga agkakaescuelaan
Iti tengnga't aldaw iti naladaw a kalgaw, nga agpana kadagiti itunomi a pirpirroca.


to be completed



Oktubre

Ronnie Es. Aguinaldo
Sta. Teresita, Cagayan

nalam-ek a sang-aw ti angin
a mangyubuyob iti agarinara
a taraudi ti dagaang
agmaris kiawen dagiti bulong
dagiti kinelleng dalapdapanen
ti balitok
agpellesen dagiti abuyo
agdungsa dagiti alimuken
dagiti alingo agwalayen

to be completed

Photo captions: Relatives mourning a dead kin before being buried at the Aglipayan cemetery in Laoag; the Laoag (Padsan) River