Adda ipalagip dagita matam, Milagros:
Ti sellag ken dagiti rabii a namituen
Ken ti suknal sadiay nagkurosan.
Adda ukagem a panawen a naruros.
Adda ipalagip dagiti paludipmo, Milagros:
Ti agek-init, ti makabiag nga angin-bakir
Ti darang dagiti parbangon ken daydi irair
Adda luktam a disso ken panawen.
Adda ipalagip dayta timekmo, Milagros:
Ti arungaing ti kutibeng, ti kanta
Ti immadak a ganggannaet, bumeggang a kinnita.
Adda lukaisam a minuyongan dagiti hasmin.
Adda ipalagip dagiti sagudaymo, Milagros:
Ti makabartek nga ayamuom dagiti sabong
Ti dayag a pimmanaw a di agsublin ditoy sidong.
Adda ukritem a sugat, adda yegmo a panaas.
naipablaak iti Bannawag
No comments:
Post a Comment