Agrangrangawak iti sabong
nga agar-arimasa
iti linnaaw iti bigbigat.
Masansan
a matimudko ti ibit dagiti maladaga
a mawaw
iti kunnot, bisong ken apros dagiti inna
a napan nakigasanggasat
kadagiti adayo a daga.
Ditoy ti nangdungdung-awak
iti ubing a pimmusay a nangan iti basura
iti rumiet a kinapanglaw idiay Tondo,
idiay Santa Maria ken Darayday.
(Nagudua ti pusok idi magaburan
a sibibiag
dagiti kapatadana kadagiti gabsuon
a rukrukitenda idiay Payatas:
Siasino itan ti makalagip kadakuada?
Siasino ti mangituloy iti arapaapda?)
Ket ditoy, agitugkelak latta iti kandela
para kadakuada a biktima
dagiti arabas ti turay.
Ngamin, mangmangngegko ti timekko
iti timekda nga agbirbirok iti apuy ti init.
Iti parbangon rugiak ti agkali
iti balitok ti bulan.
Iti kalgaw ken tudtudo rambakak
dagiti babassit nga aramid
ti rikus ti inaldaw a panagbiag.
Ti danum isu ti dara ti daga
ti kasaor ti di aggibus nga angesna.
Ngem sibugak iti isem ti parbangon
ti katawa ti agsapa, sam-it iti dayyeng
iti aglikig
Ti unnot ken sirmata iti sardam.
Ditoy, inaldaw nga iwagaywayko
ti banderak
a mangidupag iti kunniber
sangsangit dagiti babassit
uray ti panaginkukuna, ti allilaw
dagiti ipagarup a kakabsat
a mabalin a pakapasagak.
Ay, dagiti sibeg a mata
kumalay-atda iti pagwanawanan
dagiti arrap a tarigagayda!
Ay, ti pait ken sam-it ti biag!
Agrangrangawak iti sabong
nga agar-arimasa iti linnaaw ti agsapa.
Ibaklayko ti sangolko
iti kelleng nga isu ti kararua
ti dios a saan a Makakita.
